Språkåret 2013

Språkåret 2013 er eit jubileumsprosjekt med utgangspunkt i at det er 200 år sidan Ivar Aasen vart fødd, og 100 år sidan opninga av Det Norske Teatret. Målet er å feire språklege skilnader og mangfald, og å fokusere ikkje berre nynorsken, men også bokmålet, samiske språk, historiske minoritetsspråk og nye innvandrarspråk. Prosjektet var initiert av og er organisatorisk forankra i Nynorsk kultursentrum, med statstøtte frå Kulturdepartementet.

Språkåret vart offisielt opna av kulturminister Hadia Tajik den 2. januar 2013. Opningsarrangementet fann stad i kulturhuset Kilden i Kristiansand. Tidspunkt og stad var bestemt av at Det Norske Theatret hadde si fyrste framsyning i Kristiansand den 2. januar 1913.