Oplandenes Avis
Oplandenes Avis kom ut på Hamar, den største byen på Opplanda, frå 1872 til 1916.
Ho vart skipa av Olaus Arvesen (1830-1917), kjend målmann og Venstre-politikar på Hamar. Saman med Herman Anker hadde han i 1864 oppretta Sagatun, den fyrste folkehøgskolen i Noreg. Arvesen nytta fyrst si eiga vekeavis Kirkeligt Folkeblad som talerøyr, og frå 1866 var han dessutan redaktør av Hamar Stiftstidende. I 1872 fekk han sparken frå denne, og det førte til at han same året grunnla konkurrenten Oplandenes Avis. Arvesen var både redaktør, ansvarleg utgjevar og etter kvart eigar av trykkjeriet som produserte bladet.
Olaus Arvesen, som sjølv sat på Stortinget for Venstre, høyrde politisk til krinsen rundt Johan Sverdrup. Oplandenes Avis var «Organ for det uavhængig frisinnede venstre». Ho kom fyrst ut to gonger i veka, men auka frå 1879 til tre utgjevingar og frå 1889 til seks. Arvesen fekk både Johan Castberg, som i 1887 flytta til mjøstraktene, og Ivar Aasen til å skrive i avisa.
Arvesen slutta i 1906; då var han 76 år gammal. J. Konstad var redaktør ei stutt tid før Ivar Bergan overtok stillinga. Gerhard Jynge vart ny utgjevar, og avisa vart no meir høgredreidd. Politisk var det ikkje mykje som skilde avisa frå konkurrenten Hamar Stiftstidende, og i 1916 gjekk fleire «framståande menn» i Hedemarkens amt i hop om eit nytt aksjeselskap for å slå dei to avisene saman. 30. juni 1916 kom Oplandenes Avis ut for siste gong. Det nye presseorganet på Hamar fekk namnet Hamar Stiftstidende og Oplandenes Avis.