Synagogen i Arkitekt Christies gate i Trondheim
Den noverande synagogen i Trondheim ligg i Arkitekt Christies gate 1B i Trondheim. Bygninga vart opphavleg bygd som jarnbanestasjon i 1864, men vart seinare kjøpt av Frelsesarméen. Det Mosaiske Trossamfund kjøpte så bygninga i 1924, og etter omfattande ombyggingsarbeid vart den nye synagogen innvigd tysdag kveld den 13. oktober 1925.
Under andre verdskrigen vart synagogen konfiskert av nazistane (1941), og dei gjorde mykje skade på interiøret. Etter omfattande reparasjon vart synagogen attinnvigd hausten 1947.
I 1997 vart det jødiske museet opna i eit rom i synagogebygninga. Restitusjonsfondet gjorde det muleg å utbetre bygninga, og frå sommaren 2000 vart det gjort omfattande restaurering og ominnreiing av 1. etasje. Synagogen vart attopna i 2001 — no bl.a. med bibliotek, multimediasenter og eit kraftig opprusta jødisk museum.
Interiør: mørkegrøne benker, og elles lyse pastellfargar. Bimen er plassert litt framom midten i typisk asjkenazisk ortodoks stil, og dei fleste benkeradene snur mot «or’n keides» (Hekhál, toraskåpet). Det er eit galleri som tradisjonelt blir bruka som kvinnegalleri, men praksis i dag varierer noko.
Kjelder
- http://www.dmt.trondheim.no
- http://www.jodiskemuseum.no
- Brosjyre fra DMT Trondheim
- Protokoll for DMT Trondheim, 1917–1933