B. Drabløs

B. Drabløs AS var ein daglegvarebutikk i Straumgjerde i Sykkylven.

Rundt hundreårsskiftet kom Peter Langeland frå Sunnylven og slo seg ned som bakar og handelsmann i Straumgjerde. Han dreiv butikken i mange år, delvis hadde han anna arbeid attåt, og leigde deretter lokala bort i ein lengre periode.

Nokre år etter at han var død, tok enkja, Anna J. Langeland, opp att handelen, og heldt dessutan fram med Hotell Strømshorn som ho og mannen hadde drive i lag tidlegare. Butikken overlet ho til svigersonen Bjarne K. Drabløs i 1943, og han flytte i 1951 over i nybygde lokale på andre sida av vegen.

I 1965 vart firmanamnet endra til B. Drabløs A/S. Drifta vart omlagd til såkalla sjølvhjelpsbutikk, ein av dei første i bygda. Samstundes vart vareutvalet noko endra, og butikken skifte karakter frå den tradisjonelle landhandelen til ein moderne daglegvarebutikk.

Etter kvart vart både butikkarealet og parkeringsarealet for lite. Firmaet fekk kjøpe naboeigedomen i slutten av 1970-åra, og eit stort område vart avsett til parkeringsplass. Dessutan vart det teke i bruk eit stort tilbygg i 1980, og dermed var det romslege tilhøve både inne og ute. Eit tredje byggesteg vart realisert nokre år seinare. Dei siste åra har butikken vore ein del av Bunnpriskjeda. Drivar av butikken er Kåre Atle Vangen.

I åra etter krigen var det fire daglegvareforretningar i Straumgjerde. Dei siste åra har det berre vore ei.

Kjelde

• Jon Hole: Handelsnæringa i Sykkylven, Sykkylven 1983.