Anne Vindegg (1884–1980)

Fra lokalhistoriewiki.no
Sideversjon per 19. mai 2023 kl. 19:00 av Marianne Wiig (samtale | bidrag) (just)
Hopp til navigering Hopp til søk
Bilete 1: Anne i stakk med "rosut" skjorte og plagg (skaut) utanfor stølen Prestholt oppunder Hallingskarvet. Biletet vart brukt i ei lærebok for ungdomsskulen på 1970-talet.
Foto: Paul Andreas Røstad, Norsk teknisk museum/DEXTRA, 1969.

Anne Tolleivsdotter Vindegg (fødd Tufto 14. juni 1884, død 25. oktober 1980) var gardkone på Vindegg i Kvisla, Hol. På Ustaoset støla ho og hadde også arbeid med hyttefolk og andre turistar. Ho var truleg ein av dei siste i Hol som brukte folkedrakt til dagleg.

Frå Tufto

Anne vart fødd på Tufto, grannegard til Vindegg. Dette var farsgarden til mora, Mari Ellingsdotter (1847-1937). Ho gifte seg i 1871 med Tolleiv Knutson (1846-1931) frå Verpe i Ustedalen (ved Geilo). Gjennom mellom anna skreppehandel hadde han tent gode pengar. I 1871 kjøpte han Tufto og i 1896 også grannegarden Søre Juvsjordet.

Mari og Tolleiv fekk ni ungar, og Anne var nummer sju i flokken. Av syskena vart alle utanom Birgit (1879-1959) buande i heimbygda. Tre av dei vart gardeigarar: Elling (1873-1963) på Tufto, Knut (1875-1963) på Øvre Sand og Olav (1882-1956) i Søre Juvsjordet. Pål (1877-1893) døydde som 16-åring. Asbjørn (1887-1973) var heradskasserar med meir. Ragnhild (1871-1918) og Ambjørg (1889-1967) budde og arbeidde på garden til Olav i Søre Juvsjordet. Dei var alle tre ugifte. I folketellinga 1910 driv Ragnhild som budeie og Ambjørg med husgjerning. Birgit utvandra til Nord-Dakota i 1904. Ho hadde i 1899 gifta seg med Asbjørn Eirikson Tufte, som kom frå myljo Tufto på Geilo og hadde utvandra to år tidlegare, men som var heime att nokre år.

  • Bilete 2: Foreldra til Anne, Mari og Tolleiv, båe helgekledd, med to av ungane. Ukjent fotograf, Hol bygdearkiv, ca. 1880.

    Bilete 2: Foreldra til Anne, Mari og Tolleiv, båe helgekledd, med to av ungane. Ukjent fotograf, Hol bygdearkiv, ca. 1880.

  • Bilete 3: Tolleiv og Mari, med strikketøyet, utanfor Søre Juvsjordet, dit dei flutte i 1909, etter at sonen Elling overtok Tufto. Mari i stakk med ruta skjorte og plagg på hovudet. Ukjent fotograf, Hol bygdearkiv, 1910.

    Bilete 3: Tolleiv og Mari, med strikketøyet, utanfor Søre Juvsjordet, dit dei flutte i 1909, etter at sonen Elling overtok Tufto. Mari i stakk med ruta skjorte og plagg på hovudet. Ukjent fotograf, Hol bygdearkiv, 1910.

  • Bilete 4: Mari omkransa av sju av borna i Søre Juvsjordet. Som mora har Anne (øvst i midten) konehette, så biletet må tidlegast vera frå 1911, då ho gifte seg. To av brørne har også hallingklede. Ukjent fotograf, Hol bygdearkiv.

    Bilete 4: Mari omkransa av sju av borna i Søre Juvsjordet. Som mora har Anne (øvst i midten) konehette, så biletet må tidlegast vera frå 1911, då ho gifte seg. To av brørne har også hallingklede. Ukjent fotograf, Hol bygdearkiv.

  • Bilete 5: Foreldra til Anne og nokre av syskena - Ambjørg, Asbjørn, Elling og Olav - til utanfor garden Søre Juvsjordet i 1912. Ukjent fotograf, Hol bygdearkiv.

    Bilete 5: Foreldra til Anne og nokre av syskena - Ambjørg, Asbjørn, Elling og Olav - til utanfor garden Søre Juvsjordet i 1912. Ukjent fotograf, Hol bygdearkiv.

Til Vindegg

I 1911 gifte Anne seg med Ole Olson Vindegg (1880-1955), som i 1907 hadde kjøpt Vindegg. 13. januar dette året skreiv han til broren Peder i Canada at "I vinter skal jeg have Anne Tufte til tjænestepige". Også i 1909 og 1910 hadde han henne som tjenestejente. Men i 1911 skreiv han: "Jeg skal nu gifte mig med Anne Tufte i vaar ved Santhanstider saa hvis de har lyst til at ture gjestebud saa er de meget velkommen."[1]  

Åtte av dei ni syskena til Anne vart altså buande i Kvisla. Ole hadde ti sysken, fødd mellom 1877 og 1896, og fire halvsysken, fødd mellom 1903 og 1915. Det fyrste kullet var, liksom Anne sine sysken, i konfirmasjonsalder under dei to siste utvandringsbølgjene til Amerika. I 1880-åra var det tronge tider på Vindegg, og i 1887 gjekk garden på tvangsauksjon. Kan hende verka utsiktene meir lovande i Amerika enn i heimbygda. Iallfall utvandra fem av brørne hans dit.

Anne og Ole fekk sju born: Olav (1911-1994), Torleiv (1913-1986), Mikkel (1915-1988), Ingebjørg (1917-2004), Maria (1919-2003), Erling (1922-2006) og Sissel (1925-1988).

Til Vindegg høyrde mellom anna langstølen Osestølen på Ustaoset, der Anne støla. Som liten hadde ho vore med på stølen i Uri, lenger vest, der budde dei i steinbu.

Då Bergensbanen kom, sette Ole opp ei rekkje hytter på eigedomsremmen til kring Osestølen. Både støls- og hyttedrifta vart viktige inntektskjelder for garden og kravde innsats av heile familien.

  • Bilete 6: Anne og Ole med seks av ungane på trappa utanfor Osestølen, og den sjuande, Torleiv, moglegvis i døra. Familien er pynta til fest. Biletet kan vera frå dåpsdagen til Sissel, som vart fødd i januar 1925. Ukjent fotograf, 1925.

    Bilete 6: Anne og Ole med seks av ungane på trappa utanfor Osestølen, og den sjuande, Torleiv, moglegvis i døra. Familien er pynta til fest. Biletet kan vera frå dåpsdagen til Sissel, som vart fødd i januar 1925. Ukjent fotograf, 1925.

  • Bilete 7: Anne engasjerte seg mellom anna i misjon. Her frå eit møte i Kvisla kvinneforening, som var knytta til Det norske misjonsselskap. Anne står lengst bak, som nummer fem frå høgre. Ukjent fotograf/Hol bygdearkiv, 1950.

    Bilete 7: Anne engasjerte seg mellom anna i misjon. Her frå eit møte i Kvisla kvinneforening, som var knytta til Det norske misjonsselskap. Anne står lengst bak, som nummer fem frå høgre. Ukjent fotograf/Hol bygdearkiv, 1950.

  • Bilete 8: Eldrefest utanfor Hol menighetshus i Holet. På fyrste rad sit gardbrukarar og gardkjerringer i hallingklede (Anne lengst til venstre av dei fire). På raden bak har nokre av kvinnene festbunad (blant dei Anne si syster Ambjørg) med lue eller skaut. Foto: Johannes K. Brye, 1961.

    Bilete 8: Eldrefest utanfor Hol menighetshus i Holet. På fyrste rad sit gardbrukarar og gardkjerringer i hallingklede (Anne lengst til venstre av dei fire). På raden bak har nokre av kvinnene festbunad (blant dei Anne si syster Ambjørg) med lue eller skaut. Foto: Johannes K. Brye, 1961.

Dei siste stakkekjeringane

Hol og Ål var blant dei siste kommunane i landet som heldt på den regionale draktskikken. Då Aagot Noss gjorde feltarbeid her mellom 1956 og 1959, var det vanleg at gardkoner fødd før 1900 brukte "dåsakleu", som den tradisjonelle folkedrakta kallast. Nokre få ugifte kvinner brukte også dås (døs på holingsdialekt) på denne tida. Systrene til Anne, Ambjørg og Ragnhild, ser ikkje ut til å ha vore blant dei.

Anne var truleg blant dei siste i Hol som brukte stakk eller bunad kvar dag og aldri andre slags klede, fram til ho døydde i 1980. Til kvardags brukte ho oftast rutastakk med ruta eller rosete skjorter. Til sundags var det grøne, blå eller svarte stakkar med jutl (belte), og til fest hettebunad. For å få plagg og hette til å sitje på hovudet, fletta ho håret i ein ring, slik Oliva Dalen viser det i Noss si bok Nærbilete av ein draktskikk.[2]

Festbunaden endra seg i løpet av levetida til Anne, mellom anna etter påverknad av Hulda Garborg, som ivra for forenkling. Det synte seg til dømes i hovudplagga. På eldrefesten i 1961 (bilete 8) har kring tjue bunad. Av kvinnene har fire hette, fire lue og to plagg på hovudet. Berre gifte kvinner kunne bære hette. Ulike variantar av hetter ser me elles på bileta 2, 4, 5 og 14. Ugifte brukte tradisjonelt pannelin til festbunaden, men utpå 1900-talet vart det vanleg med lue. Ein variant av denne lua, ser me på bilete 14.

Som utanpåklede har Mari og Anne på bilete 2 og 4 korte opentrøyer. Slike hadde høgare status enn kneppetrøyene. Sylvspennene er festa til trøya, medan dei på bilete 14 er festa på stakken. På bilete 4 har Mari brodert (truleg med korilstein) brystklut, medan Anne har sylvlekkje mellom spennene i trøya. Dei har elles silkeslør i halsen (sjå mellom anna bilete 14) og kvitsauma skjorte.

  • Bilete 9: Anne med spann i bakken ned mot Osestølen. Her var ho gravid med Ingebjørg, som vart fødd 6. oktober dette året. Difor har ho ikkje jutl i stakken. Ukjent fotograf, 1917.

    Bilete 9: Anne med spann i bakken ned mot Osestølen. Her var ho gravid med Ingebjørg, som vart fødd 6. oktober dette året. Difor har ho ikkje jutl i stakken. Ukjent fotograf, 1917.

  • Bilete 10: Frå slåtten på vollen nedanfor Osestølen. Anne i rutastakk med jutl og skaut, Ole i busserull utan lokale særmerke. Biletet er tatt av hytteeigar Trygve Serck-Hanssen, 1939.

    Bilete 10: Frå slåtten på vollen nedanfor Osestølen. Anne i rutastakk med jutl og skaut, Ole i busserull utan lokale særmerke. Biletet er tatt av hytteeigar Trygve Serck-Hanssen, 1939.

  • Bilete 12: Biltur til "vestsida" (eigentleg sør) på Ustaoset. Kaffepause i sumarsola. Foto: Ingebjørg Vindegg, 1970-talet.

    Bilete 12: Biltur til "vestsida" (eigentleg sør) på Ustaoset. Kaffepause i sumarsola. Foto: Ingebjørg Vindegg, 1970-talet.

  • Bilete 13: Anne spelar ringspel på Ustaoset, der både Tufto og Vindegg hadde stølar. Til høgre skimtar me ei steinbu, lik den ho budde i då ho var med på stølen i Uri som liten. Foto: Ingebjørg Vindegg, 1970-talet.

    Bilete 13: Anne spelar ringspel på Ustaoset, der både Tufto og Vindegg hadde stølar. Til høgre skimtar me ei steinbu, lik den ho budde i då ho var med på stølen i Uri som liten. Foto: Ingebjørg Vindegg, 1970-talet.

  • Bilete 14: Anne i full festbunad utanfor Vindegg, med fjøset i bakgrunnen. Jentebunaden til barnebarnet har truleg gått i arv. Foto: Ingebjørg Vindegg, om lag 1967.

    Bilete 14: Anne i full festbunad utanfor Vindegg, med fjøset i bakgrunnen. Jentebunaden til barnebarnet har truleg gått i arv. Foto: Ingebjørg Vindegg, om lag 1967.

Fotnotar

  1. ↑ Brev frå Ole O. Vindegg til Peder Vindegg 13. januar 1907, 4. april 1909, 20. mars 1910 og 27. mai 1911. Fra Norgesbrevsamlingen til Norsk lokalhistorisk institutt ved Nasjonalbiblioteket.
  2. ↑ Noss: 53-56

Kjelder og litteratur

Hentet fra «https://dev.lokalhistoriewiki.no/index.php?title=Anne_Vindegg_(1884–1980)&oldid=1878588»