Bautasteinen i Hol
Bautasteinen ved Hol gamle kyrkje vart reist i samband med grunnlovsjubileet 1914.
Ei nemnd som hadde fått i oppdrag å stå for det store jubileet, hadde bestemt seg for å få reist ein bauta der namna på dei frå Hol som var med i krigen med Sverige frå 1807-1814 skulle hoggast inn. Det vart leita mange stader for å finne eit emne til bautastein, og ein dag dukke Kitil Sausgardhaugen opp på kontoret til ordføraren og forkynte: «No har eg funne stein, gut». Ut av denne store steinen vart det kila ut fleire bautasteinar. Mikkel Holestøl og sonen Lars sto for utkilinga av steinen.
Avdukingsfesten: Avdukinga skjedde 21. juni 1914 som ein del av den store Amerikafesten der mange utvandra holingar kom attende til fødebygda for å feire grunnlovsjubileet. Innsamla midlar frå holingar i Amerika kosta innhogginga av dei mange namna og A. D. Andersen frå Voss hogg dei inn.
I NU 4.8.1914 skriv Mehlum om avdukinga: «Da dekket falt, gaves det salut oppi åserne saa det drønede like til det gjeld det blaaner i».
Bautasteinen fraktast forbi tingstugu i Hol. Foto:Olav Reinton, 1913. Eigar: Hol bygdearkiv.
