Just Henrik Ely

Just Henrik Ely (fødd i Stavanger 30. november 1759, død i Kristiansand 30. mars 1824) var offiser og eidsvollsmann.

Foreldra var Ernst David Ely (1731-1809) og Guria (hjå Ovenstad: Guna) Pedersdotter Megeland (1742-?). Faren var offiser, og på det tidspunktet Just Henrik var fødd, var han løytnant ved Skånevikske kompani i Sunnhordland. Seinare vart faren tollinspektør i Tønsberg.

Just Henrik Ely gifta seg i Vanse (i nåverande Farsund kommune) med Caroline Nikolaia Lund (fødd i Farsund 5. mars 1773, død i Kristiansand 27. april 1844). Ho var dotter til «Farsunds grunnleggjar» kjøpmann og skipsreiar Jochum Brinch Lund og Inger Marichen Lund. Bryllaupet stod den 30. desember 1791, same året som Ely fekk teneste i Listerske kompani der i distriktet. Ekteparet budde truleg i Farsund frå fyrst av, og enno ved folketeljingstidspunktet 1801. Rett etter flytta dei sannsynlegvis til Ryfylke/Stavanger, slik den militære karrieren (nedanfor) indikerer. Systera hans budde hjå dei i Farsund, men ingen born er nemnde i folketeljinga. Dei har sju tenestefolk i hushaldet.

Just Henrik Ely kom i teneste i hæren som 12-13-åring, ved regimentet som farens kompani tilhøyrde. Avansementet var som følgjer:

• 1772: Korporal ved 2. Vesterlenske nasjonale infanteriregiment.
• 1774: Sersjant ved same regiment.
• 1782: Sekondløytnant a la suite (i påvente av stilling)
• 1784: Verkeleg sekondløytnant ved regimentets 3. Ryfylkske kompani.
• 1786: Premierløytnant ved 2. Stavangerske kompani.
• 1788: Same grad ved 3. Stavangerske kompani.
• 1791: Same grad ved 3. Listerske kompani
• 1796: Same grad ved 1. Listerske kompani.
• 1800: Karakterisert kaptein
• 1801: Kaptein og sjef for 2. Ryfylkske kompani.
• 1802: Sjef for 1. Stavangerske kompani.
• 1811: Major 1811
• 1814: Major og sjef for jegerkompaniet i Vesterlenske regiment.
• 1818: Stilt på vartpengar ved hærreduksjonen det året.

Kjelder og litteratur

• Folketeljinga 1801
• Fure, Eli: Eidsvoll 1814. Hvordan grunnloven ble til. Dreyer 1989.
• Koht, Halvdan: Artikkel om Ely i Norsk biografisk leksikon 1926.
• Ovenstad, Olai: Militærbiografier. Den norske hærs officerer fra 18. januar 1628 til 17. mai 1814. Bd I. Oslo 1948.
• Schnitler, Carl W.: «Officerene» i Halvdan Kohts og Carl W.Schnitlers kapittel om eidsvollsmennene i Eidsvold 1814. Kristiania 1914.