Kristian Østberg
Kristian Østberg (fødd 1867 i Grue, død 1942 i Ås) var rettslærd og dr.jur., dosent i rettslære og nasjonaløkonomi ved Norges landbrukshøgskule frå 1918. Foreldra var gardbrukar Johannes Østberg og Johanne Moe. Han var gift i 1895 med Harriet Jensine Bryhn (1866–1915). I andre ekteskap var han gift (1918) med Marie Bagaas (1873–1961).
Østberg er mest kjend for bokverket Norsk bonderett I–XII (1914–39). Det fyrste bandet, som gjev ei framstilling av Av kreaturbrukets rets- og sedvaneregler, disputerte han på for den juridiske doktorgraden i 1915. Innsamlinga av bonderettsleg tradisjonstilfang og skikk og bruk gjorde Østberg til si livsoppgåve.
Alt i 1901 og 1902 hadde han stipend frå Universitetet for å sanke munnleg tradsjon på Finnskogen om innvandringa til finnane, og frå 1903 reiste han kvar sommar rundt i landet for å samle opplysningar om norsk bonderett, i åra 1912–24 med stipend på kulturbudsjettet. Han drog òg på studieferder til utlandet, Stockholm og Uppsala, København, Lund, Færøyane og Orknøyane.
Kjelder og litteratur
- Haukaas, Kaare: artikkel i Norsk biografisk leksikon bind XIX. Oslo 1983.
|
