Johannes Lavik
Johannes Lavik (fødd 1856 i Hosanger, død 1929 i Bergen) var lærar, bladmann og målmann. Foreldra var gardbrukar Johannes Lavik og Kari Andersdotter Kyte. Han var gift med Olivia Heitmann (f. 1851, d. 1921) frå Molde.
Han tok artium i 1877 og vart lærar på Augsburg seminar, Minneapolis, USA. Han studerte gresk og historie på University of Minnesota og reiste i 1882 attende til Noreg. I 1886 vart han cand.mag. Saman med Paul Bergh dreiv han 1888–90 ein høgre skule på Voss.
Han arbeidde ein del år i Firda og Bergens Tidende, men i 1904 skipa han Gula Tidend, som han dreiv til 1919 da han slutta av politiske grunnar. I åra 1921–25 redigerte han Bondebladet, organ for Bondepartiet på Vestlandet.
Johannes Lavik var ein ihuga og markant talsmann for målreisinga og gjorde framlegg om å skipa Noregs mållag (1906).
Kjelder og litteratur
- Hirth, Eirik: artikkel i Norsk biografisk leksikon bind VIII. Oslo 1938.
- Johannes Lavik i Historisk befolkningsregister.
|
