Vilnius
Vilnius (lit.), Wilno (polsk), Вiльня (kviterussisk), ווילנע/Vilne (jiddisch) eller Вильна/Вильно/Вильнюс (russisk) er ein tradisjonelt fleirspråkleg og fleirkulturell by som i dag er hovudstaden i Litauen. I den russiske folketeljinga i 1897 var det ca. 40 % jødar; ca. 30 % polakkar; ca. 20 % russarar; og under 5 % kvar av kviterussarar, litauarar og tyskarar der.[1] Byen, som òg har vorte kalla Jerusjolàjim der Lite ('Litauens Jerusalem') var eit av dei viktigaste sentra for jiddisch kultur, og ein del av jødane i Skandinavia har familiebakgrunn frå Vilnius og nabodistrikta. I folketeljinga 1910 for Kristiania er det registrert 31 personar med Vilnius (Wilna/Vilna) som fødestad. Blant desse er familiane Levin, Jaffe og Lasnik.[2]
Etter sjoá er det svært få jødar att i Vilnius så vel som i Litauen generelt. I den litauiske folketeljinga i 2001 var det 59,2 % litauarar, 19% % polakkar, 14,4 % russarar og 4,2 % kviterussarar i Vilnius.[3] I dag er byen det viktigaste senteret for litauisk kultur og økonomi.
Nordmannen Lauritz Nilssøn, betre kjent som Laurentius Nicolai Norvegus eller Klosterlasse, levde dei siste åra av livet sitt i Vilnius. Han er gravlagt i Johanneskyrkja (Šv. Jonų bažnyčia).
Fotnotar
- ↑ «Demographic history of the Vilnius region» på Engelsk Wikipedia.
- ↑ Søk på «Wilna» og «Vilna» i folketeljinga 1910 for Kristiania (Digitalarkivet).
- ↑ «Demographic history of the Vilnius region» på Engelsk Wikipedia.
|
