Trønder
- Denne sida handlar om språkforma trønder. For folk frå Trøndelag, sjå trønderar.
Trønder eller trøndermål, òg kalla trønderdialekt, trøndsk eller trøndersk, er ei av hovudgruppene av norske dialektar. Trøndermåla blir tradisjonelt snakka i heile Sør- og Nord-Trøndelag og Nordmøre; og i tillegg i Bindal kommune i Nordland; i Frostviken og Herjedalen i Sverige; samt i Elgå og Kvikne i Nord-Østerdalen. Strukturelt er trøndermåla særprega av tjukk l, jamvekt og varierande grad av apokope. Alle desse trekka er felles med norrländska (inkludert jamska) i Sverige og austsvenske mål på vestkysten av Finland og i Estland. Innanfor Norge er trøndermåla strukturelt sett mest i slekt med austlandsmåla og ordgeografisk sett vel så nært i slekt med nordnorsk.
.jpg)
Underdialektar
Trøndermåla blir oftast inndelt i hovudgruppene uttrøndsk og inntrøndsk. Uttrøndsk inkluderer nordmøring, fosning og ytternamdaling med respektive underdialektar; og inntrøndsk inkluderer dalmåla i Sør-Trøndelag, så vel som dialektane i midtre og indre deler av Nord-Trøndelag. Trondheimsdialekten står i ei mellomstilling, men har mest til felles med fosenmåla i formverket.