Mjølfjell
Mjølfjell er ei grend inst i Raundalen i Voss herad. Området har namn etter det kvite Mjølfjellet, som òg markerer grensa mellom Voss og Ulvik. Mjølfjell-området har særleg vorte nytta til støling, og gardar i både Voss, Ulvik og Aurland har hatt sommarbeite her.
Etter at Bergensbanen opna i 1909, med eigen stasjon på Mjølfjell, har grenda vore ein populær rekreasjons- og turiststad. Spesielt bergensarar har farta mykje til Mjølfjell. På 2000-talet er det privathyttene som dominerer staden, men her er det òg eit ungdomsherberge (bygd i 1939).
Staden hadde på 1900-talet ein del fastbuande, knytt til jernbane, turisttrafikk og gardsdrift/støling, og difor var det skule her (1914-64). Mjølfjell kapell vart innvigd i 1967. Daglegvarebutikken på Mjølfjell vart lagt ned i oktober 2009, men opna att i 2014. I Rjoandalen ligg det eit militært skytefelt.
Frå hotell til hytter
Stadheim Høifjellhotel var i drift frå om lag 1920 til 1963, då det brann ned. Kårdal pensjonat vart bygd i 1934, og hadde stor trafikk i 1960- og 1970-åra. Mjølfjell Feriekoloni (1925-ca. 1965) vart brukt som friluftsskule og feriekoloni for folkeskulane i Bergen kommune.
Alt rundt 1912 kom og dei fyrste privathyttene. I 1920-åra var det om lag 20 hytter, dei fleste i området rundt garden Allmenningen med stølen Hellene (Hedlo?). Seinare bygde institusjonar og bedrifter større hytter og hus. På slutten av 1900-talet var det eit samanhengande belte med hytter frå Mjølfjell stasjon i vest til ungdomsherberget i aust.
Personar
Den kjende revymannen Bias Bernhoft vart fødd på Mjølfjell i 1902.
Galleri
Mjølfjell stasjon i 1909, då Bergensbanen vart opna.Foto: Anders Beer Wilse
Rallarvegen kjem ned til Mjølfjell ved ungdomsherberget.Foto: Trond Nygård (2011).
Ungdomsherberget på Mjølfjell; framom renn Kleivelvi.Foto: Nasjonalbiblioteket
Kleivelvi litt lengre ned, ved brua sør for Speidartjørni, me ser austover.Foto: Trond Nygård (2019).
Mjølbotn sett frå Kleivavegen.Foto: Trond Nygård (2021).
Mjølfjell Hotel.Foto: Nasjonalbiblioteket
Kjelder og litteratur
- Andersen, Knut S. og Christian Hysing-Dahl: Mjølfjell i fjern og nær fortid, Bergen 1996.
- Reime, Reidar og Per Jon Odeen: Mjølfjell og menneskene, Bergen 2012.